Tescht

Jetzt isch es Ziit mir chönd's eu säge

das Läbe wo ihr läbed das läbed ihr vergäbe

s'isch alles nur en Bluff gsii en blöde Scherz

d' Lüg vo Liebe Sehnsucht Hass und Schmerz

s' isch alles nur en Traum gsii en böse

chömed dävo weg tüend eu devo löse

s' isch alles verbii fertig aus Ende Schluss

und das alles ohni Ranglischte und Siegerkuss

am Endi git's kei Gold Silber und Bluemechranz

es git kei Lob Orde und Freudetanz

es git kei Lohn Erbarme und Paradies

kei Triumpfböge und Unschuld isch nöd wiis

händ ihr würklich gmeint s' Gröscht und Schönscht segs Bescht

es tuet eus leid

Das isch nur en Tescht!

Wached uuf es git keis Ziil

es git keis 2. Männli bi dem Spiel

es git nüüt woner eu no dra chönted hebe

das händ ihr gnueg lang gmacht das isch es ja ebe

es git kei Versteck und kei Sucht

weli Droge für weli Flucht

es isch alles nöd wahr nei nöd Würkichkeit

niemer hät Schuld und niemer hät verseit

d' Wält isch kaputt und d'Luft isch grau

aber niemer vo eus macht die Wält zur Sau

Drooge Armuet Hunger überall

es isch nöd eusi Schuld es isch ja egal

Alptraum i dä Stadt uf de Strasse

was söll dänn das wer wird's sich's amasse

z' meine er heg d' Lösig das isch Utopie

alles wird guet es isch ja verbii

es git kei Widerwille und kei Protescht

es tuet eus leid

Das isch nur en Tescht!